فـتاوي المـلا چــاسب

اول الكلام ما بعد السلام

2010-05-31T16:23:00.000-07:00

السلام وبعد

اعزائي المريدين تقبلوا هذا الجهد المتواضع من الذليل امام اللّوهي عبدكم الملا چاسب لو چان إلي ظل چان بيها مجال يدوم

واعلمو بان هذا الجهد مو شغله جديده عليّه فآني معروف بين ربعي بشغفي الشديد على ابقاء علاقات طيبة بين الانس والجان بالرغم من المشاكل التي تثار حول ركوب هذا او ذاك من البشر فمثلا بعض التقمص بي فائدة عامة كحالتي آني فمثلا لو ما اتقمص انسان ما چان يصير مجال بأن اتواصل مع حضراتكم

الرجاء راسلوني بالدعاء وستجدون مني الجواب الكافي لكافة اسئلتكم الشرعية وغير الشرعية

الملّا چاســـبْ الخانـوَچي الجِّـني

فتوى في الإستغناء عن السماعات في الجوامع

2008-07-11T11:22:00.000-07:00

استفتاء من ابو جورج من بغداد الجديدة

ملا، هسة آني شلّلي بالصلاة والصوم فشنو ذنبي لمّن الجامع اللي بصفّ بيتي يطوّط خمس مرات باليوم اذا مو اكثر وخصوصا وكت الفجر، يعني لازم الآذان يصير بالستيريو والسماعات؟

عزيزي ابو جورج، شغلت السماعات هاي بدعة لان وكت الرسول ما چان اکو لا إسبيكرات ولا ميكروفونات وهاي البدعة هل الوكت بالذات اصبحت نشاز لأنه بين كل جامع وجامع صار اكو جامع ومسجد وحسينية. مو كل الناس تصلي فليش يفرض هذا الموضوع عليهم وما يليه من تأنيب الضمير؟ لا الشغلة مو معقولة خصوصا وان كان القياس على التكنولوجيا المستحدثة ودورها في تنبيه الناس على اوكات الصلاة فماكو داعي للموامنة ان يستعملون سماعات في وكت يگدرون يدزّون بي مسجات (يعني اس ام اس) للي يسجل لهذه الخدمة الإلكترونية بدال ما يطرشون الخلگ ويزعجوهم. فللي يريد يصلي خل يشتري لنفسه موبايل (انصحكم بـ"آسيا سل") وخلي الشيخ او السيد يدزله مسج إب كل موعد ونفس الشي يسري على اجراس الكنائس وكافة السبل الدعائية الدينية الاخرى التي حرمتها هيئة الإنتخابات...وعلى هذا نختم

الملا چاســب

استفتاء في علم الغيب

2008-07-11T11:16:00.000-07:00

استفتاء من ابو منتظر من الحلة

ملا چاسب، هل يعلم الجان بالغيب واذا هيچ اشوكت رح يظهر المهدي ويصفيها وخصوصا جاري ابو محمد يستاهل يتصفى إشكم مرة اگله لا يذب الزبل براس الشارع وما يسمع كلام هل الكلب ابن الكلب؟

ابو منتظر اخاف عبالك ثابت الآلوسي هذا اللي يطلع بالتلفزيون جنّي؟ تره هو قزم مو جني...لا إحنه الجان ما نعرف الغيب فيما سيحدث ولكن نعرف إشصار بأي مكان بالدنيا وجواباً على سؤالك فالمهدي ظهر من حوالي اربع اشهر بس للأسف خطفوا جيش المهدي (...اسمعت ان الاعور الدجال علسه)، ومن ذاك الوكت واحنه انساومهم ووصلنه وياهم إلى اربع دفاتر بالإضافة الى شوالين مواد مكبسلة ولهسة ما راضين يهِددوا...وعلى هذا نختم

الملا چاســب

فتوى في انواع السلطة

2008-06-07T22:01:00.000-07:00

استفتاء من الاخ فلاح نعمان رشيد من الزبير

ما هي انواع السلطة المشار إليهه في الآية القائلة "لا تقربوا الزّلاطة وانتم سكارى" وهل تندرج المزّة تحت هذا البند؟

عزيزي فلاح, اولاً الآية تقول "لا تقربوا الصلاة وانتم سكارى" فكافي تخيط وتخربط, وجواباً على سؤالك حول السلطة فيقول جلال بن حسام الدين الطالباني (...وهو من كبار الثقاة واثقلهم شأناً) عن ميشيل بن إدده الملّوخي عن نبيل بن شعيل انه سمع الشيف رمزي عليه التحية يقول: "السلطة ومنها التبولة والفتوش والجرجير والسيزر وما تيسر من خضروات مع القليل من الزيت والليمون وبعض الملح احياناً" ونقلا عن صحيح المقلي الذي اخرجه ابن ماجي: "السلطة وما تبعها من مقبلات باردة كالحمص والباباغنّوش ولا يصح اعتبار المقبلات الساخنة كالفول والفتَة منها وكلها مبطلة للصيام والريجيم", وقياساً عليه نضع الترمس واللبلبي والطرشي باصنافه في خانة المزّات اللذيذة التي تعوض عن الزلاطة...وعلى هذا نختم

الملا چاســب

فتوى في تحديد النسب الحسني والحسيني

2008-06-07T21:51:00.000-07:00

استفتاء من السّيد الشريف سبهان بن السيّد الشريف هليّل بن السّيد الشريف جريو آل اطعينش الأعور الموسوي الحسيني العلوي الفاطمي المحمدي من على متن سفينة النجاة

ملا چاسب, چا آني سيّد وبويه سيّد والماما علْوية والوادم بنّجف يِردون مني خُمس السيّد وما يطّوني حگي من الدَخَلّْ والخَرجيه؟ چا شوني ويه هطرگاعة؟

يا سبهان يا خوية, مال إنته سيّد هاي صعبة وإذا إنت ما تدري فآني ادري إبسوايات الحجية أم اطعينش وإن كان هنالك نور محمدي في الموضوع في حقبة من الحقبات فمؤكداً انقطع الإرسال, فعوفنه من سالفة الخمس العليك واللي إلك, وخلينا نسولف إب موضوع تحديد النسل في ما يخص السلالتين الحسنية والحسينية فكيف بنا ومئات الآلاف من ابناء وبنات الشعب العراقي يدعون النسب الهاشمي وملايين مؤلفة تدعي هذا الشرف ايضاً في ايران والشام والهند وباكستان ومصر (نقابة الأشراف في مصر بيها خمس ملايين منتسب!!) وتركيا وكذلك حكام الاردن والمغرب وحتى عوائل مارونية مسيحية كبيت الحسيني وبيت الهاشم من اعمال جبيل في لبنان كذلك, چا حتى ابو عمر البغدادي يصيح آني حسيني, يعني كل ذولة گرايب ومن نفس الحمولة؟ الشغلة مو منطقية ابداً ابداً وثم ابداً, وفي العلم الحديث هناك علم الجينات او ما يعرف بالـ"دي ان اي" والذي عن طريقه ممكن تحديد الگرابة بين فلان وفلتان وفي اي جد من الاجداد تلتقي الارحام, فإذا الجماعة بالنّجف يسوولنه معروف ويصرفون شوية من ارباح الخمس لهذا العالم (...هاي السنة انفلاقية!) في إعداد دراسة علمية حيث يتم اخذ عينات جينية من حوالي خمسة آلاف سيّد وعلوية من ذوي العوائل الحسنية والحسينية المعروفة, فإذا عشرين بالمئة منهم نسبهم صحيح فرح يبيّن هذا الموضوع حين يلتقون في الجد الثاني والاربعون او الجد الثالث والاربعون او الجد الرابع الاربعون (...بين وادم هل الزمن والحسين حوالي اربعين جيل) فبالتالي سنستطيع تحديد الرمز الجيني في الـ"دي ان أي" للسادة الاصحاح ومن ثم نستطيع ان نختبر كل ادعاء بالإنتساب الهاشمي عن طريق فحص مخبري قصير وسهل ومئة بالمئة صحيح, لأن لغة الارقام لا تكذب بكثر ادعاءات البعض ومفاخرتهم بأمجاد الاجداد...وعلى هذا نختم

الملا چاســب

فتوى في حواري الجنّة

2008-06-01T10:45:00.000-07:00

استفتاء من الاخ حمد محمد احمد من عالم البرزخ

لمن اوصل بالسلامة إنشاء الله للجنّة (شوية معاملتي متعطلة چيف الجماعة مضيعين الإضبارة مالتي) هل يجوز استبدال الإثنان وسبعون حورية بغلمان بيض وحلوين؟

ابو خالد چم مرة اگلك راسلني بإسمك الصريح وكافي كلاوات, ترة ماكو فتاوي إلك إلا لمن تجر عدل...وعلى هذا نختم

الملا چاســب

فتوى في احكام الأذان

2008-06-01T10:31:00.000-07:00

استفتاء من الاخ ابو فلاح من الدنمارك

ما حكم تناوب الأذآن الشيعي والسني في قناة العراقية؟

باوع لي زين حبيبي, حمادة لمّن دزّة إلبلال البلبل حتى يلم الخلگ بالجامع ما انطـآ نص حرفي وگلّه لازم إتگول "الله اکبر" ثلاث مرّات وما گلّة لازم تغرِّد بالعربي مو بالحبشي وما انطـآ تعليمات بأن الوذآن لازم يكون على مقام نهَوَند. مفهوم؟ يعني بلال اجتهد إبكيفه لأن الوذآن مو فد شغلة اساسية گد الصلاة لان الصلاة هي تسديد الطاعة لرب العالمين بالأقساط. فالوذآن بهذه الحالة هو فقط تذكير بالصلاة والتحفيز عليها والوذآن ما إله نص خاص ومحدود ولا بالضرورة يكون بالعربي, فمثلا في تركيا الجمهورية حاولو يخلون الوذآن بالتركي بس التجربة ما دامت بسبب التعنّت الديني. فسالفة "حي على خير العمل" او "علي ولي الله" هي اجتهادات مقبولة. وفي زمن الماديّات لا ضرر بالتحفيز على الصلاة مثلاً بذكر "سحب على سيارة كورولا اليوم" في الوذآن او التلميح بـ"جوائز ترضية" ومن الجائز توزيع بسكت وچاي للتشجيع على حضور صلاة التراويح أو حتى الإعلان عن بوفيه مفتوح إذا تسير ذلك على الإخوة...وعلى هذا نختم

الملا چاســب

فتوى في العمامة والبرلمان

2008-05-31T17:31:00.000-07:00

استفتاء من الاخ العلامة إذلال الدين الكبير من بغداد

ما هو حكم ارتداء العمامة في قبة البرلمان؟

بما ان العمامة تندرج تحت الزي الوظيفي منذ ايام صديقي القاضي ابو يوسف في عهد الخليفة الهارون الذي ادخل الطيلسان الاسود ليميز به رجال الدين وكان اذا ترك العالم السلك الوظيفي قام بنزع الطيلسان وتوارثت العادة الى ايام "مودة" البدلات الافندية فكان رجال الدين من المعارضين لأي تغيير وخصوصا في ازياءهم فنرى بأن اول من حرّم العمامة لغير رجال الدين هو السلطان العثماني محمود الثاني في اول القرن التاسع عشر واستبدلها بالطربوش ومن ثم جاء السلطان مصطفى كمال في الربع الاول من القرن العشرون وحرّم الطربوش واستبدلها بالقبعة ولكنه ابقى العمامة كزي وظيفي لرجال الدين والديانة. وفي غياب النص الصريح في هذه المسألة علينا بالقياس والمنطق اللي يگول إشمعنه الطبيب العضو في مجلس النواب ما يحضر الجلسات وهو لابس الصدرية والسمّاعة؟ والجواب بأن لكل مكان آدابه فليس من اللائق ان يحضر من كان في يوم من الايام خبّاز او نائب عريف او مطهرچي بالزي الوظيفي السابق إذا ما تم اختياره لمجلس النواب وهذا الكلام يشمل النواب من رجال الدين لأن شكو وظائف دينية تحت الگبة البرلمانية؟ ليش اكو مهر السيّد لو غسل الميّت لو صيغة لو استخيار اثناء مناقشة ميزانية وزارة البيئة, مثلا؟ بالطبع كلا, فعليه يا حبّاب العمامة لازم تنعاف بالإستعلامات قبل الدخول إلى القاعة التشريعية...وعلى هذا نختم

الملا چاســب